Отворената комуникација, меѓусебниот интерес, времето за себе и заедничкото решавање на проблемите се дел од основата на секоја здрава врска. Сепак, многу зависи од потребите на двајцата партнери.

Не постои единствен модел на здрава врска што им одговара на сите. Секој има различни потреби, а тие може да се менуваат во текот на животот.

За една врска да биде успешна, важно е двајцата партнери да го добиваат она што им е потребно, но и да имаат доволно простор да се развиваат како личности.

Како изгледа една здрава врска?

Здравите врски имаат една важна заедничка особина а тоа е дека можат да се приспособат на новите околности. Луѓето се менуваат и минуваат низ различни животни периоди, а со нив треба да се менува и односот.

Ова се некои од најважните знаци дека една партнерска врска има здрава основа.

Отворена комуникација

Партнерите во здрава врска можат да разговараат и за пријатните и за тешките теми. Кога имаат различни мислења, се слушаат без осудување и отворено ги кажуваат своите ставови.

Комуникацијата треба да оди во двете насоки. Важно е да чувствувате дека можете слободно да зборувате, но и да знаете дека партнерот ќе ги сподели своите мисли, чувства и грижи кога нешто го мачи.

ПОВРЗАНО: Дали љубовта е доволна за успешна врска? 

Доверба

Довербата подразбира искреност и чесност. Не криете важни работи еден од друг и не се сомневате во секој чекор на партнерот кога не сте заедно.

Но довербата не се сведува само на верност. Таа значи дека покрај партнерот се чувствувате безбедно и опуштено. Знаете дека нема намерно да ве повреди, ниту физички ниту емоционално. Верувате дека ви го посакува најдоброто, но и дека ја почитува вашата способност самостојно да носите одлуки.

Ја задржувате својата индивидуалност

Во здрава врска, партнерите се блиски и си даваат поддршка, но не ја губат својата самостојност. Се чувствувате сакано и прифатено, но вашата самодоверба не зависи целосно од одобрувањето на партнерот.

И понатаму имате свои пријатели, блиски луѓе и интереси. Одвојувате време за работите што ве исполнуваат и не очекувате партнерот да ја задоволи секоја ваша потреба.

Се интересирате еден за друг

Меѓусебниот интерес значи дека ве интересираат мислите, целите и секојдневието на партнерот. Сакате да го гледате како се развива, наместо да очекувате да остане ист или да стане личноста што вие сте ја замислиле.

Тоа подразбира и подготвеност да разговарате за промени ако начинот на кој функционира врската повеќе не му одговара на едниот или на двајцата.

Имате време за себе

Почитувањето на потребата за личен простор е важен дел од здравата врска. Времето за себе може да го поминете сами, со пријателите и семејството или занимавајќи се со нешто што го сакате.

Заедничкото време е важно, но тоа не значи дека секој слободен момент мора да го поминувате заедно. Времето поминато одделно може да биде добро и за двајцата партнери.

Има простор за забава и опуштеност

Важно е во врската да има место за смеа, шеги и спонтани моменти. Ако можете да се забавувате заедно и да уживате во друштвото еден на друг, тоа е добар знак.

Животните тешкотии понекогаш влијаат врз расположението и комуникацијата. Во такви периоди, односот може привремено да стане посериозен или понапнат. Сепак, способноста да најдете барем кратки моменти на блискост и опуштеност може да ви помогне полесно да ги поминете тешките периоди.

ПОВРЗАНО: 6 знаци дека сте во здрава врска со партнерот

Физичка блискост

Интимноста често се поврзува со сексот, но не се сведува само на него. Една врска може да биде здрава и без сексуални односи, доколку тоа им одговара на двајцата партнери и нивните потреби се почитуваат.

Физичката блискост може да вклучува бакнување, прегрнување, гушкање или спиење во ист кревет. Без оглед на нејзината форма, важно е и двајцата да се чувствувате пријатно, безбедно и поврзано.

Вашиот физички однос најверојатно е здрав ако:

можете слободно да покажете желба за секс и да разговарате за него

го прифаќате одбивањето без навредување и притисок

отворено зборувате за своите желби

се чувствувате безбедно кога кажувате дека сакате повеќе или помалку секс

Здравата интимност подразбира и почитување на сексуалните граници. Тоа значи:

да не го притискате партнерот за секс или за одредена сексуална активност откако ќе каже „не“

да споделувате важни информации за други сексуални партнери

отворено да разговарате за заштитата и ризиците поврзани со сексуалното здравје

Конструктивно ги решавате несогласувањата

Во стабилната врска, партнерите се однесуваат како тим. Се поддржуваат и кога не се согласуваат или кога нивните цели не се сосема исти. Несогласувања има во секоја врска. Нормално е понекогаш да чувствувате лутина, разочарување или фрустрација.

Најважно е како ги решавате конфликтите. Ако можете искрено да разговарате за разликите, без навреди, потценување и омаловажување, поголеми се шансите да најдете решение што ќе им одговара на двајцата.

Знаци дека нешто не е во ред во врската

Врската треба да придонесува да се чувствувате блиско, исполнето и сигурно. Ако покрај партнерот често сте вознемирени, тажни или несреќни, можеби постојат проблеми што не треба да ги занемарите.

Секоја нездрава врска изгледа различно, но ова се дел од најчестите знаци дека нешто не е во ред.

Едниот партнер се обидува да го контролира или промени другиот

Не можете да принудите некого да се промени. Ако ви пречи одредено однесување, треба да можете отворено да разговарате за него. Во ред е да кажете како се чувствувате и да побарате од партнерот да размисли дали може нешто да промени.

Но не е во ред да му наредувате што да прави или да се обидувате да го контролирате. Ако партнерот постојано прави нешто што не можете да го прифатите и не сака да разговара за тоа, можеби треба да размислите дали таквата врска може да опстои.

ПОВРЗАНО: Зошто раскинувањата без кавги и предавства болат најмногу? 

Партнерот не ги почитува вашите граници

Границите може да се однесуваат на секој дел од врската – од начинот на комуникација до приватноста и физичката блискост. На пример, можеби сте кажале: „Кога ќе се вратам од работа, ми треба малку време за себе. Мило ми е што те гледам, но сакам прво да се опуштам.“

Сепак, партнерот ја игнорира вашата потреба и веднаш бара физичка блискост. Кога ќе кажете „не“, одговара дека не може да се воздржи. Ако јасно сте поставиле граница, а партнерот постојано ја преминува или ве убедува да се предомислите, тоа е сериозен знак дека нешто не е во ред.

Не поминувате доволно време заедно

Врската можеби се соочува со проблем ако постојано поминувате сè помалку време заедно, а за тоа нема јасна причина, како семејни тешкотии или повеќе обврски на работа.

Загрижувачки е и ако се чувствувате оддалечено или ви олеснува кога партнерот не е покрај вас. Можеби дури барате изговори за да не поминувате време заедно.

Врската не е рамноправна

Здравата врска подразбира рамнотежа. Таа не се однесува само на парите и домашните обврски, туку и на вниманието, комуникацијата, нежноста и очекувањата.

Повремената нерамнотежа е нормална. Едниот партнер може привремено да остане без приходи, да не може да извршува дел од домашните обврски поради болест или да биде помалку расположен за блискост поради стрес.

Проблемот се појавува кога товарот постојано паѓа врз едниот партнер, а другиот не покажува желба нешто да промени.

Партнерот често ве критикува или навредува

Постојаните критики и намерно навредливите зборови не се дел од здравата врска. Тоа особено важи за забелешките поврзани со изгледот, облеката, храната, интересите или личните избори. Критиката поради која се срамите или се чувствувате лошо во сопствената кожа не е конструктивна.

Внимавајте и на тоа како партнерот зборува за другите. Вашиот однос можеби изгледа здрав, но говорот на омраза, навредите и дискриминаторските коментари можат многу да откријат за неговите ставови.

Имате чувство дека партнерот не ве слуша

Можеби партнерот делува незаинтересирано кога зборувате за некој проблем или споделувате нешто што ве мачи. Можно е и да избегнувате посериозни разговори затоа што очекувате дека нема да ве сфати сериозно.

Недоразбирања се случуваат во секоја врска. Но ако сте објасниле што ве мачи, а партнерот не презема ништо или веќе следниот ден се однесува како разговорот да не се случил, проблемот најверојатно не е решен.

Се плашите да кажете дека не се согласувате

Ако партнерот одговара на различното мислење со потценување, презир или грубост, тоа покажува дека не ги почитува доволно ниту вас ниту вашите ставови.

Ако внимавате на секој збор или премолчувате затоа што се плашите од неговата реакција, размислете дали се чувствувате безбедно во таа врска. Може да побарате стручна помош или да разговарате со блиска личност на која ѝ верувате.

Прашања што треба да си ги поставите

Не може да се применуваат исти правила на секоја врска. Сепак, ако се прашувате дали вашата е здрава, овие прашања може да ви помогнат пореално да го процените односот.

Дали вашата врска е здрава?

Прашајте се:

1. Дали партнерот ме поттикнува да се развивам?
2. Дали имаме заеднички цели за иднината?
3. Можам ли да бидам свој/своја покрај партнерот?
4. Дали го прифаќам партнерот таков каков што е?
5. Дали двајцата вложуваме приближно еднакво во врската?
6. Дали мојот живот е подобар со оваа личност?
7. Дали времето што го поминуваме заедно има значење за мене?

Пет или повеќе потврдни одговори може да бидат знак дека вашата врска има цврста основа. Сепак, овие прашања се само насока, а не конечна процена на вашиот однос.

Совети за здрава врска

Ако се препознавте во некој од знаците дека нешто не е во ред, разговорот со психолог или терапевт што работи со парови може да ви помогне.

Партнерската терапија не служи за да утврди кој е во право. Таа им помага на двајцата партнери да го согледаат сопственото однесување и заеднички да работат на односот. Барањето помош не значи дека врската пропаднала, туку дека сте подготвени да вложите труд за да ја подобрите.

Дури и најздравите врски понекогаш бараат дополнителен труд. Овие совети може да ви помогнат:

• прифатете ги меѓусебните разлики;
• решавајте ги проблемите како тим;
• пробајте ново хоби или активност заедно;
• разговарајте за личните цели и желби;
• продолжете да се интересирате за мислите, ставовите и погледите на партнерот.