Домашната гранола е еден од оние рецепти што лесно влегуваат во секојдневната рутина. Се подготвува брзо и може да се прилагоди според тоа што веќе го имате дома. 

Гранолата што се продава во маркетите често содржи додадени шеќери, адитиви, конзерванси. Постојат и поквалитетни опции, но нивната цена е значително повисока. Затоа домашната варијанта останува едноставен избор што може да се вклопи во секојдневната исхрана.

Ова се неколку начини како да ја вклучите во оброците:

• како појадок со јогурт и свежо овошје 
• како брз оброк со млеко 
• како додаток врз овесна каша
• како лесна ужина комбинирана со јаткасти плодови

Потребни состојки

270 гр. овесни снегулки

65 гр. кокосов шеќер (или кафеав шеќер, шеќер од урми)

40 гр. овесно брашно

20 гр. кокосово брашно

10 гр. чиа семе

130 гр. путер од бадеми

55 гр. кокосово масло (растопено)

80 гр. јаворов сируп (или агаве)

200 гр. темно чоколадо

малку сол

цимет

1 мала лажичка екстракт од ванила

 

Подготовка

1. Загрејте ја рерната на 165°C и обложете голем плех со хартија за печење.
2. Во голем сад измешајте ги сувите состојки: овесните снегулки, кокосовиот шеќер, овесното брашно, кокосовото брашно, чиа семето, солта и циметот.
3. Во друг сад измешајте ги течните состојки: путерот од бадем, растопеното кокосово масло, јаворовиот сируп и ванилата. Мешајте додека не добиете мазна смеса.
4. Додадете ги течните состојки во сувите и мешајте додека не се добие хомогена смеса која треба да биде малку леплива и да формира грутки.
5. Распоредете ја смесата рамномерно на плехот. 
6. Печете 20 минути, потоа извадете го плехот и нежно промешајте ја гранолата со лажица или шпатула, за да се распредели повторно рамномерно низ плехот. Завртете го плехот и печете уште 10–15 минути, додека добие златна боја и пријатен мирис. 
7. Извадете ја од рерна и оставете да се олади 10–15 минути. Додека е сè уште топла, но не жешка, внимателно додајте парчиња од темното чоколадо. Така ќе омекнат доволно за да се поврзат со гранолата, без целосно да се стопат.
8. Оставете ја целосно да се олади пред складирање. Гранолата дополнително ќе се стврдне додека се лади. Од кога ќе биде оладена искршете ја на парчиња.