Постојат искуства што веднаш менуваат како се чувствуваш во сопственото тело. Без наметнување, тие те повикуваат да забавиш, да се опуштиш, и да бидеш присутен. Секој допир, секој звук, секој мал детал е таму со причина — да те потсети дека не мораш да брзаш.
Hygge Spa Studio е едно такво место, сместено во срцето на Скопје. Со инспирација од корејската head spa традиција, но прилагодено на нашиот ментален и емотивен пејзаж, Хиге предизвика љубопитност кај многумина. Она што се издвојува не е само техниката, туку начинот на кој се гради целото искуство — преку темпо, внимание и детали.
Овој концепт ја враќа основната идеја на нега - да се биде присутен, да се почувствува телото, и да се забележи што сè носиме со себе — а ретко имаме време да го слушнеме.
Разговараме со Матеа, која по само неколку месеци од отворањето, споделува што значи да се создаде ваков спа концепт во Македонија, зошто head spa е повеќе од тренд и што ја враќа секогаш кон себе.
Како се роди идејата да го отвориш Хиге спа студиото и да донесеш корејските третмани во Македонија?
Три месеци по отворањето на Хиге, сè повеќе верувам дека токму ова нешто ми било потребно за да го смирам мојот брз и преоптоварен ум.
Го замислував како место каде што секој човек ќе пронајде тишина, мир, и ќе го чуе она што му го кажува неговото тело. Замислете си капсула во која сте одделени од телефонот и од сите нотификации, мејлови и пораки.
Имате време и можност да го погледнете својот живот од поинаква перспектива и да си кажете „благодарам“ за сè она што често го заборавате дека е важно.
Корејскиот head spa сосема случајно (или можеби и не) се покажа како првата услуга што го нуди тоа чувство на внатрешен мир.
Зошто токму корејските спа техники? Што е она што те инспирира кај корејскиот пристап кон убавината и благосостојбата?
Веќе некое време се восхитувам на источните ритуали за грижа на себе. Убедена сум дека head spa е уметност. Секој третман може да биде различен, прилагоден на расположението и чувството што недостасува кај секој клиент.
Ако отворите YouTube и пребарате „ASMR head spa“, ќе навлезете во еден сосема друг свет. Мали, удобни простории. Целото внимание е посветено на еден клиент и неговата благосостојба. Секој мал детал има за цел да предизвика чувство на среќа и мир.
Не знам за другите, но секогаш кога се чувствувам физички најубаво – тоа е неслучајно период кога внатрешно чувствувам најмногу среќа, благодарност и смиреност.
Често се зборува за холистички пристап во негата и убавината. Како Хиге спа студио го имплементира тоа?
Интересно е колку сè почесто забележувам дека многумина од нас не се ни свесни колку навистина ни треба пауза — сè додека не си ја дадеме.
Пауза од информациите, од вревата, од постојаните стимулации што ги примаме – скролање по социјални мрежи, скокање од едно во друго, движење низ гужва, галама, брзи кафе-разговори...
Би рекла дека холистичкиот пристап се чувствува уште од самиот почеток на секој третман. Главен фокус се става на дишењето – на контролирање и фокусирање. Штом успееме да го смириме телото, умот го следи.
Интересно е што тука се задоволуваат повеќе сетила истовремено – нешто што ретко го доживуваме во секојдневието.
Преку нежниот мирис на билни чаеви, допирите од дрвени алатки и меки четкички, тивките звуци и смирувачките мелодии, топлината од водата и билните топки... сè заедно создава чувство на длабока грижа и присуство. Повеќето не го ни нарекуваат третман – туку прекрасно искуство.
Што најмногу ги изненадува клиентите кога првпат ќе ги пробаат третманите?
Не знам што најмногу ги изненадува, но знам дека неколку реченици постојано се повторуваат: „Отидов на некое друго место“, „Баш ова ми требаше.“
Можеби звучи необично, но се случувало клиент да го заврши третманот со солзи во очите. Сметам дека тоа е една преубава енергија и состојба во која човек си дозволува да биде безбеден.
Како ги следиш глобалните трендови за нега и убавина, особено оние од Кореја?
Не би рекла дека студиото се фокусира на следење на трендови. Хиге претставува едноставност, благосостојба и пријатно чувство. Повеќе се трудам да забележам со какви предизвици се соочуваат луѓето тука, кај нас. На тој начин можам да разберам што точно им е потребно и како можам да го понудам тоа чувство за време на третманите.
Ако го посетите студиото, ќе забележите поинаков ентериер – нема никаков „луксуз“. Она што сакам да го постигнам е да се врати во тренд тишината, љубезноста и човечноста.
Кој третман на Хиге Студио ти е личен фаворит и зошто?
Во Хиге има еден главен третман – Hygge Spa. Од него произлегуваат уште две верзии: со подолго времетраење и само масажа на глава. Не би можела да издвојам омилен, бидејќи секое искуство се гради според моментот и потребата.
Ако треба да издвоите една навика за убавина и благосостојба што секоја жена (или маж) треба да ја практикува, која би била?
Секој треба сам да открие што е она што му носи најмногу среќа и чувство на смиреност. За некого можеби е кафе со себе. За друг – прошетка без телефон. Медитација, или едноставно слушање на птици, ветер, вода...
Не би можела да издвојам една навика – сите сме различни. Она што мене ми носи чувство на благосостојба, на мојот партнер, на пример, понекогаш му е здодевно – и обратно.
Доколку сакате да ѕирнете како изгледа едно Hygge искуство одблиску, погледнете го Instagram профилот : @hyggespastudio