Пептидите ги има во сè повеќе серуми и креми за лице. За нив најчесто се зборува како за состојка што може да ги ублажи воспаленијата, да го изедначи тенот и да ја намали видливоста на брчките.

Речиси секој ден се појавува нова популарна состојка која ветува поздрава и поубава кожа. Дел од овие состојки се само добро рекламирани, а други навистина заслужуваат внимание. Пептидите припаѓаат во втората група.

Наједноставно кажано, пептидите се кратки синџири од аминокиселини. Тие се дел од протеините што ѝ се потребни на кожата, меѓу кои се колагенот и еластинот.

Колагенот е составен од три полипептидни синџири. Одредени пептиди можат да го поттикнат неговото создавање во кожата. Повеќе колаген значи поцврста и помазна кожа, со помалку видливи ситни линии и брчки.

Со текот на годините, телото создава сè помалку колаген. Кожата постепено ја губи цврстината, брчките стануваат поизразени, а тенот може да изгледа нерамномерно и без сјај.

Токму затоа пептидите станаа честа состојка во производите за нега на зрела кожа. Еве што може реално да се очекува од нив и на што треба да се внимава при изборот на производ.

ПОВРЗАНО: Кој е вашиот тип на кожа? 

Придобивки од пептидите за кожата

Молекулата на колагенот е преголема за да се впие преку кожата. Затоа многу луѓе избираат да го внесуваат преку храна, како супа од коски, или преку додатоци во исхраната.

Пептидите, од друга страна, можат да навлезат во кожата и да учествуваат во различни процеси во организмот. Вклучувањето серум или крема со пептиди во секојдневната нега може да има неколку придобивки.

Ја зајакнуваат кожната бариера

Кожната бариера е надворешниот слој што ја штити кожата од бактерии, сончеви зраци, загаден воздух и други надворешни влијанија.

Пречестото користење пилинзи и киселини може да ја ослаби оваа заштита. Влијание имаат и чадот од цигари, загадувањето и недостигот од сон. Пептидите можат да го поддржат обновувањето на кожата и да помогнат во зајакнувањето на нејзината природна бариера.

Ја намалуваат видливоста на брчките

Колагенот ѝ дава цврстина и затегнатост на кожата. Кога неговото количество се намалува, ситните линии и брчките стануваат повидливи. Пептидите можат да го поттикнат создавањето колаген, па кожата со текот на времето може да изгледа помазно и поцврсто.

Ја подобруваат еластичноста на кожата

Пептидите се поврзани и со еластинот, протеин кој ѝ помага на кожата да остане еластична и затегната. Благодарение на него, кожата полесно ја задржува формата и изгледа поцврсто.

Ги ублажуваат воспаленијата

Одредени пептиди можат да ја смират воспалената кожа и да го поддржат обновувањето на оштетените делови. Со редовна употреба, можат да придонесат и за порамномерен тен.

Можат да помогнат кај акните

Некои пептиди имаат антимикробни својства. Тие можат да го ограничат растот на бактериите поврзани со појавата на акни и на тој начин да помогнат во негата на проблематичната кожа.

Како делуваат пептидите врз кожата?

Пептидите можат да продрат низ надворешниот слој на кожата и да навлезат подлабоко, наместо да останат само на нејзината површина. Тие функционираат како гласници меѓу клетките. Испраќаат сигнали кои ги поттикнуваат клетките да создаваат колаген и еластин.

ПОВРЗАНО: Дали треба да користите ретинол во лето? Еве што треба да знаете

Како да изберете производ со пептиди?

На пазарот има голем број производи со пептиди, па изборот понекогаш може да биде тежок. Следниве насоки можат да помогнат.

Изберете соодветен вид производ

Најдобар избор се серумите и хидратантните креми, бидејќи остануваат подолго на кожата. Средствата за миење лице имаат пократок контакт со кожата и брзо се плакнат, поради што пептидите во нив можат да имаат послаб ефект.

Внимавајте со кои состојки ги комбинирате

Пептидите добро се комбинираат со витамин Ц, ниацинамид, антиоксиданси и хијалуронска киселина. Комбинирањето со алфа-хидрокси киселини, познати како AHA киселини, може да ја намали делотворноста на пептидите.

Проверете ја листата со состојки

Пожелно е пептидите да бидат наведени поблиску до почетокот на листата со состојки. На декларацијата можат да бидат означени и со зборовите „palmitoyl“, „palmitoyl tripeptide-1“ или „palmitoyl tetrapeptide-7“.

4 производи со пептиди достапни кај нас

Цените се од моментот на пишување и може да се променат.

Напомена: Производите се наведени за информативни цели. Линковите не се партнерски, а Omnia.mk не добива провизија од купувањето преку нив.
 

Што треба да се знае пред да се користат пептиди?

Пептидите често се претставуваат како чудесно решение за кожата. Во некои тврдења дури се споредуваат со ботокс. Одредени невротрансмитерски пептиди можат привремено да го блокираат дејството на хемиските сигнали што предизвикуваат контракција на мускулите. Сепак, нивниот ефект е значително послаб од ефектот на ботоксот.

Иако пептидите можат да бидат корисни за кожата, треба да се земат предвид и нивните ограничувања:

• Производите со пептиди, особено оние наменети за нега на зрела кожа, често имаат повисока цена.
• Научните истражувања за дејството на пептидите сè уште се ограничени. Ретинолот и AHA киселините се подолго проучувани и за нивното влијание врз знаците на стареење има повеќе докази.
• „Пептиди“ е заедничко име за повеќе различни состојки. Секој вид има различна улога, па и резултатите зависат од тоа кои пептиди ги содржи производот.
• Натписот „со пептиди“ на пакувањето често се користи и како маркетиншка порака. При изборот се важни конкретниот вид пептиди, нивната концентрација и целата формула на производот. Совет од дерматолог може да биде корисен, особено кај чувствителна или проблематична кожа.
• Алергиските реакции на пептиди се ретки. При појава на црвенило, чешање или оток, употребата на производот треба да се прекине.