Во сабота, 1 ноември, со почеток во 11:00 часот, во населбата Расадник – Кисела Вода, ќе се одржи голема еколошка акција за чистење, во организација на граѓанското движење „За почиста Македонија“.

Локацијата, која со години е запоставена и преплавена со отпад, ќе добие нов изглед благодарение на група волонтери кои сакаат да покажат дека за чиста животна средина не се потребни големи ветувања, туку мала, но искрена акција.

Организаторите порачуваат дека нивната цел е да потсетат колку секојдневната грижа за просторот околу нас е важна, особено во време кога загадувањето и несовесното однесување стануваат сè почеста слика во урбаните средини.
 

„Со тимска работа, позитивна енергија и љубов кон природата ќе го разубавиме просторот и ќе му го вратиме сјајот кој го заслужува,“ велат од „За почиста Македонија“.

Акцијата е отворена за сите граѓани кои сакаат да помогнат, а опремата за чистење ќе биде обезбедена од организаторите. По завршувањето, волонтерите традиционално ќе уживаат во неформално дружење со музика, друштвени игри и убава атмосфера – потсетување дека грижата за природата може да биде и заедничка радост.

Во изминатите години, „За почиста Македонија“ реализирaa бројни акции низ земјата, обединувајќи луѓе од различни градови со истата цел - преку волонтерство и заедничка акција да покажат дека секој поединец може да направи реална промена.

Настанот во Расадник е поддржан од dm drogerie markt, во рамки на проектот „{Заедно} до зелени идеи“, кој има за цел да поттикне граѓански иницијативи што придонесуваат кон заштита на животната средина.