Викендот е создаден за пауза. За бавно утро, мирна мисла и шолја нешто топло што ќе го врати балансот по долгата недела. За многумина, тоа нешто е шоља чај — природен начин да се забави телото и да се смири умот.

Во свет каде што сè се случува пребрзо, чаеви се потсетник дека не секој ритам мора да биде брз. Тие се мали сојузници на мирот, ја намалуваат напнатоста, го поттикнуваат варењето, ја балансираат енергијата и, пред сè, создаваат чувство на топлина и спокој.

Камилица 

Камилицата е вистински лек за денови кога сакате да го намалите внатрешниот притисок. Нејзиниот благ вкус и мирисот што потсетува на пролетно попладне имаат природно смирувачко дејство. Помага при несоница, го намалува стресот и го релаксира дигестивниот систем. Најубаво е да се пие навечер, кога светлата ќе се пригасат и денот конечно ќе заврши.

Нане 

Нането е совршен избор за оние кои сакаат нешто поосвежително. Го разладува телото, ја смирува вознемиреноста и помага при главоболки. Идеално е за викенд утро, со книга или филм, кога сакате нешто што ќе ве освежи без да ве „разбуди“ премногу.

Маточина 

Маточината е билка што природно го намалува стресот и ја подобрува концентрацијата. Нејзиниот мирис потсетува на лимон и зелени ливади, а вкусот е нежен и благ. Одличен избор е за попладне кога сакате да се исклучите од мислите и да си подарите момент за себе.

Липа 

Липата има посебно место во македонските домови. Нејзиниот благ, сладок вкус и карактеристичен мирис често асоцираат на детство и грижа. Одлична е за опуштање пред спиење, но и во моменти кога сакате да го забавите умот и да се потсетите на нешто едноставно — топлина и мир.

Ѓумбир и лимон 

Ако сакате нешто поинтензивно, чајот од ѓумбир и лимон е вистинска комбинација. Го поттикнува имунитетот, го загрева телото и внесува пријатна енергија. Совршен е за неделно попладне кога сакате да се подготвите за новата недела со чувство на свежина.

Вистинското уживање во чајот не е само во вкусот. Станува збор за мал ритуал — момент кога го забавуваме темпото, кога седнуваме свесно, кога мирисот на билките нè враќа во сегашниот миг. Со едноставна шолја чај, викендот станува подолг, пополн и потопол.