Во последно време, сè повеќе луѓе бараат начин да се опуштат, да го намалат стресот и да се поврзат со себе – на страна од класични терапии. Една од тие алтернативи која станува сè попопуларна и кај нас е звукотерапијата со кристални звуци.

Што точно се случува на една ваква сесија? Дали звукот навистина може да влијае на телото и умот? Сесиите со кристални звуци се базираат на работа со фреквенции и вибрации кои го поттикнуваат нервниот систем да влезе во состојба на длабока релаксација. Луѓето што пробале забележуваат намалување на стресот, подобар фокус и чувство на внатрешна смиреност по завршувањето на сесијата.

Разговаравме со Ива Зафировска, звукотерапевт која користи кристални садови, звучна виљушка и други инструменти за да им помогне на луѓето да се поврзат со себе и да го пронајдат сопствениот мир.

Што е терапија со кристални звуци и како се изведува?

Звукотерапијата со кристални звуци e холистичка метода која користи главно кристални садови и ѕвончиња. Во мојата пракса, звукотерапијата е збогатена и со океански тапан, дождовен стап и други инструменти. Таа се остварува преку пренос на соничните бранови и вибрации, кои помагаат во релаксацијата, балансот на енергијата и подобрување на општото здравје.

Сесијата обично се изведува во лежечка положба, додека звукот – преку својата фреквенција и вибрација – делува директно на умот, телото и духот, создавајќи состојба на хармонија и внатрешен баланс.

Во мојата пракса, употребувам и кристална виљушка, со која се изведува звучна масажа, која уште се нарекува и тонална акупунктура. Тука исто се работи со звучни фреквенции – звучната виљушка е наштимана на 136,1 hz. Поставувајќи ја истата на меридијани, акупунктурни точки, енергетски центри, органи и други делови од телото, се постигнува уште поголема релаксација. Со тоа се даваа и акцент на физичкото тело, кое „се штима“ на своите природни фрекфенции, каде би требало да вибрираме секојдневно. Се намалува болката и мускулната тензија, овозможувајќи „chi flow“ – слободно течение на животната енергија.

Како звучните вибрации влијаат на телото и умот?

ФОТО: Приватна архива

Вибрациите можат да ја намалат напнатоста, болката, да го регулираат нервниот систем и да поттикнат длабока релаксација. Го намалуваат стресот, ги олеснуваат емоциите, едноставно дозволуваат да се издишеме и да го пуштиме она кое веќе не ни служи.

Всушност, влијаат на мозочните бранови, водејќи не во состојба на мир и медитација, односно во една тета состојба на свест, каде ние можеме да поразговараме со себеси, да поставиме намери и да си ги препознаеме блокадите. Едноставно да се набљудуваме од еден поинаков агол, да добиеме увид, да манифестираме, да бидеме благодарни и ја подобриме нашата психо-физичка рамнотежа.

Како започнавте да се занимавате со звукотерапија и што Ве инспирираше да го изберете овој пат?

Моето патување во звукотерапијата започна од мојот вечен интерес за езотерија и спиритуалност, духовен развој, звукот како лек, љубов кон музиката и методи на природно и алтернативно лекување. Секако не изостанува тука и конекцијата со себе и природата, мајка Земја, подлабоко разбирање на себе, па оттаму и другите.

Вечен борец сум за подобрување на секојдневието и живеење посвесно, сакајќи да сум слободна и неограничена, за да можам да го правам исклучиво тоа што ме исполнува. Тоа е воедно и мој дар да го дадам, со желба да им помогнам на другите, во една борба, надеж и желба за подобар свет и поголема колективна свест. Вибрирање во мир, слобода и љубов, наместо во страв и матрикс.

„Секој звук има своја намера, секоја вибрација носи порака“.

Кои се најчестите придобивки што ги имаат вашите клиенти по терапија со кристални звуци?

Клиентите најчесто пријавуваат чувство на длабока релаксација и благодарност, наоѓање на мирот во тишината „под звукот“, сонично dream-like патување, намалување на анксиозноста, стресот и емоционалната тензија.

Имаат подобрен сон, олеснување на тинитус, подобрено ментално здравје, полесно понатамошно справување со панични напади, полесно справување со хипертиреоза, зголемена енергија и радост, полет, чувство на моќ, чувство дека сѐ е можно. Храброст за да ги надминат и пуштат траумите. Спознание, зошто некои работи се такви какви се, бистар ум, зголемена самодоверба и воља, со фокус на подобрување на животот. Свесност за себе и околу себе. Љубов кон Земјата, себе и другите.

Некои велат дека чувствуваат ослободување од долго задржани емоционални блокади и воочување на мисловни структури кои не им служат, со можност за изнаоѓање на соодветни начини, за тоа како да се справат со своите состојби и проблеми.

Редовната звукотерапија може да го намали нивото на кортизол (хормон на стресот) и да го смири нервниот систем, да ја подобри концентрацијата. Многу луѓе ја користат како алатка за медитација, саморефлексија и емоционална регенерација.

Едноставно ни помага да се заземјиме и успориме, овде и сега. А кога сме во состојба на релаксација, сигурност и смиреност, добиваме точен увид за тоа што ни е потребно и така го поттикнуваме самолекувањето.

Како изгледа една типична сесија со звукотерапија и колку трае?

Типичната сесија трае околу 70–90 минути. Започнува најчесто со краток вовед и прашања, прелевајќи се во искрено споделување на состојбата и намерата на клиентот или групата.

Потоа практикуваме заземјување со дишење, благодарност и поставуваме намери. Постои можност за plant medicine – рапе (за индивидуални и сесии во пар), но само за тие кои вистински го прифаќаат тој пристап, го чувствуваат како потреба и имаат почит кон мајка Земја.

Продолжуваме со звучната масажа и полека навлегуваме во звучната медитација со различни инструменти. Крајот е нежно будење, неколку минути за интеграција и по желба, споделување на искуството.

Кои се вашите совети за оние кои се нови во звукотерапијата и сакаат да ја пробаат за прв пат?

Отворете се вистински кон искуството, облечете удобна облека, дојдете хидрирани, бидете во состојба на прифаќање и дозволете му на звукот да ве води.

Секоја сесија носи различно искуство, бидејќи секој човек доаѓа со своја состојба и енергија. Опуштете се, без страв и срам, и дозволете му на звукот да ве води. Дозволете сѐ што е потребно да излезе на површината, дишете и пуштајте го тоа што не ви служи.

Кои се вашите идни планови и цели во областа на звукотерапијата?

Планирам да вклучам повеќе инструменти и да одржувам сесии во природа, како и да ги воспоставам сите мои идеи за приватни настани, форми и изведби на звучна терапија.

Сакам да организирам ритрити и соработувам со одредени државни институции. Преку нови соработки, да развијам навика на велнес тим билдинг во компаниите, да креирам настани и програми за личен развој со помош на исцелувачки звук. Да го проширувам знаењето за оваа терапија преку работилници и онлајн содржина, како и своето, вклучувајќи нови методи за звучна хармонизација.

Како терапијата со кристални звуци ве промени вас лично и вашиот животен пат?

ФОТО: Приватна архива

Ми помогна да станам уште посвесна за сопственото тело, емоции, моќ и енергија.

„Преку звукотерапијата најдов уште еден начин да го одржувам сопствениот баланс на ум-дух-тело, и да се одржувам на висока вибрација“.

Го зголеми моето изобилие во сите сфери. Добив поголем увид за себе си, а и за тоа како да се поврзам уште подлабоко со себе и да го кренам енергетското ниво.

Оттаму, можам да им помагам на другите во нивниот процес на исцелување, разбирајќи и чувствувајќи ги луѓето уште повеќе. Ме направи уште по слободна и по самоуверена, потсетувајќи ме дека секогаш можам да правам сè што сакам – и сега тоа е мојата реалност.

Ива Зафировска (soundhealingskopje) е звукотерапевт која води индивидуални и групни сесии во Скопје и низ Македонија. Работи со кристални садови, звучна виљушка и други инструменти, со фокус на лична трансформација и енергетска рамнотежа.