Главоболките се една од најчестите невролошки состојби (поврзани со мозокот) ширум светот. Иако секој може да почувствува главоболка од време на време, честите појави може да укажуваат на тоа дека имате посериозни проблеми. Постојат три основни типови на главоболки: тензични главоболки, кластерни главоболки и мигрена.
Повеќето главоболки се акутни (што значи, тие се појавуваат ненадејно и обично се краткотрајни) и сами поминуваат без потреба од дополнителна медицинска или алтернативна помош. Но, понекогаш, главоболките можат да станат хронични или долгорочни состојби. Без разлика дали имате одредена состојба што предизвикува главоболки или вашата болка е предизвикана од фактори на животниот стил, хроничната главоболка може да се развие од различни причини.
Иако симптомите честопати можат да бидат непријатни, добрата вест е дека со мали промени може да ја намалите сериозноста на вашите симптоми. Ова вклучува разбирање на факторите на ризик и внесување на промени во животниот стил.
Кој е најмногу изложен на ризик?
Иако секој може да доживее главоболка во одреден момент, некои луѓе може да имаат зголемен ризик да искусат симптоми. Различни фактори, навиките на животниот стил и демографијата може да го зголемат ризикот од главоболки. Секој тип на главоболка има и свој сет на фактори на ризик.
Фактори на ризик за тензични главоболки
Тензичните главоболки предизвикуваат блага до умерена болка на двете страни од главата. Оние кои доживуваат тензични главоболки го опишуваат чувството како стегање околу слепоочниците и главата. Следниве фактори може да го зголемат ризикот од појава на симптоми на тензична главоболка:
- Возраст меѓу 15 и 35 години
- Физички стрес или мускулна напнатост
- Депресија или анксиозност
- Недоволно спиење или будење во текот на ноќта
- Прескокнување оброци во текот на денот
Фактори на ризик за кластер главоболки
Кластерните главоболки не се толку чести како тензичните главоболки или мигрената. За жал, кластерните главоболки често предизвикуваат најтешки сет на симптоми. Можеби сте најмногу изложени на ризик за развој на кластер главоболка ако:
- Пиете алкохол
- Пушите цигари
- Имате проблеми со спиењето во текот на ноќта
- Имате историја на траума на главата или повреда на мозокот
Фактори на ризик за мигрена
Мигрената е вид на главоболка што може да предизвика неколку симптоми настрана од болка, вклучувајќи чувствителност на светлина и звук, аура (визуелни халуцинации) и гадење. Фактори кои можат да го зголемат ризикот од мигрена вклучуваат:
- Возраст меѓу 30 и 39 години
- Стрес, анксиозност или депресија
- Епилепсија (состојба што предизвикува напади)
- Менструација или промени во нивото на хормоните
- Потешкотии со спиење, како што е несоница или често будење во текот на ноќта
- Прекумерна употреба на лекови против болки
- Прескокнување оброци
- Конзумирање алкохол и пијалоци со кофеин
- Изложување на силни светла, гласни звуци или силни мириси
Како да се намали ризикот
Постојат неколку работи што можете да ги преземете за да спречите епизоди на главоболка и да ги намалите симптомите. Како ќе спречите епизоди ќе зависи од видот на главоболка што го имате, вашите симптоми и вашите предизвикувачи. Општо земено, комбинацијата на промени во животниот стил може да ви помогне да се справите со симптомите.
Избегнување на тригери
Многу видови на главоболки – особено мигрена – се активираат од одредени тригери. Секој човек различно ги доживува тригерите.
Клучниот аспект на превенцијата вклучува идентификување на тригерите и преземање на правилни чекори за да ги избегнете. Добар начин да дознаете за вашите тригери е да водите дневник за тоа што мислите дека може да ги предизвика вашите епизоди, како што се оброците што ги јадете, околината во која се наоѓате и други навики или активности во кои учествувате пред почетокот на симптоми.
Вообичаени предизвикувачи на главоболки може да вклучуваат:
- Емоционален стрес
- Хормонални промени како што се менструацијата или земање апчиња за контрацепција
- Прескокнување оброци
- Временските промени
- Проблеми со спиењето
- Силни мириси
- Силни светла
- Алкохол
- Храна и пијалоци кои содржат кофеин
Имајте на ум: горенаведените предизвикувачи не се целосна листа. Може да искусите други тригери. Она што е важно да се запамети е дека откако ќе го идентификувате тригерот, треба да се обидете да го избегнете за да видите дали епизодите на вашата главоболка се намалуваат или целосно исчезнуваат. Водењето евиденција за тоа што успева и што не успева да ги запре вашите епизоди е многу корисно бидејќи тоа ќе ви помагне да ги намалите симптомите.
Квалитетен сон
Нарушувањата на сонот, како што се будењето среде ноќ, несоницата или недоволното спиење, може да предизвикаат главоболки. Доволно спиење и спиење навреме се едни од поефикасните начини за спречување на главоболки.
Некои совети за добар сон вклучуваат:
- Спијте најмалку седум часа навечер
- Одете во кревет и станувајте во исто време секој ден
- Одржувајте ја вашата спална соба мирна, тивка
- Избегнувајте да гледате телевизија или да „седите“ на телефон пред спиење
- Ограничете го внесот на кафе и алкохол најмалку три часа пред спиење
- Вежбајте во текот на денот за да го потикнете сонот
Хидрирајте се
Истражувањата покажуваат дека недоволното пиење вода може да доведе до појава на симптоми на главоболка. Колку вода ви треба ќе зависи од различни фактори, како што е средината во која живеете, вашата телесна тежина и нивоа на активност.
Општо земено, експертите препорачуваат дека луѓето треба да пијат околу 2 литри вода секој ден. Имајте на ум дека вие најдобро го познавате вашето тело. Значи, пијте вода колку што ви е потребно за да ја одржите вашата благосостојба и да избегнете да се чувствувате дехидрирано.
Вежбање
Доволно вежбање исто така може да помогне да се намали зачестеноста и сериозноста на вашите главоболки. Вежбањето е клучно за помагање во управувањето со стресот – вообичаен предизвикувач на главоболки – и промовирање на подобар сон. Физичката активност може да ги намали чувствата на анксиозност и депресија. Колку вежбање ви треба ќе зависи од вашите животни навики и цели.
Справување со стресот
Стресот е вообичаен предизвикувач на главоболки, па затоа е добра идеја да се најдат начини за ефикасно справување. Секој доживува стрес и не постои начин да се елиминира целиот стрес од вашиот секојдневен живот. Но, учењето здрави техники за справување може да го намали стресот и да ги подобри симптомите на главоболка.
Може да размислите да ги испробате следните техники за управување со стресот:
- Учествувајте во релаксирачки активности, како што се пишување дневник, читање или правење активности во кои уживате
- Распоредете го времето за одмор за себе и квалитетно време со вашите најблиски
- Кажете „не“ на плановите и задачите што можат да предизвикаат поголем стрес
- Разговарајте со стручно лице за ментално здравје за да дискутирате за какви било проблеми или стресни фактори кои би можеле да ги влошат вашите главоболки и целокупното здравје
Пробајте комплементарни методи и техники
Комплементарната и алтернативната медицина исто така може да ви помогне да ги намалите симптомите и да ја спречите зачестеноста на епизодите на главоболка. Некои вообичаени алтернативни терапии вклучуваат:
Јога: Вклучува вежби за истегнување, техники за дишење и релаксација кои можат да ја намалат мигрената и другите видови на главоболка.
Акупунктура: Врз основа на древната кинеска медицина, акупунктурата става мали игли на различни делови од телото за да го стимулира протокот на енергија, или „чи“.
Биофидбек: Биофидбекот користи специјализирани уреди за мерење на вашиот физички одговор на стрес. Ова ви помага да препознаете кога доживувате стрес и да користите стратегии за справување за да го намалите вашиот физички одговор на стресот.
УСЛОВИ ЗА ПРЕЗЕМАЊЕ
Текстовите и останатите материјали што ги објавува Омниа.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Омниа.мк.
