Одржување на хигиената на телото е од огромно значење, не само за јога практикантите, туку за сите луѓе. Јогините, покрај основните добро познати начини на одржување на секојдневна хигиена, имаат и свои техники кои дејстувуваат за подобрување на општата благосостојба на телото. Една од тие техники е џала нети, техника за прочистување на носната шуплина, која се користи како алтернативен начин за справување со воспалени синуси, а исто така поволно делува и при чести настинки, грип, главоболки, астма и други респираторни проблеми.
Првата од петте нијами во Јога сутрите на Патанџали е „saucha“ која може да се преведе како чистота. Во овој контекст ќе претпоставиме дека меѓу другото се однесува и на „телесна чистота“, што може да биде првиот чекор кон посуптилните форми на внатрешна чистота.
Што е џала нети?
Нети е техника која површински ги чисти синусите и воедно го стимулира телото да ги исчисти другите токсини од лимфниот систем.
Многу луѓе ја применуваат оваа техника секојдневно за да ги одржат своите синуси чисти и да го подобрат дишењето. Откако еднаш ќе биде совладана техниката, истата делува смирувачки и пријатно. Ако вашите носни канали се блокирани како резултат на загадувањето, поленот, прашината и останатите надразнувачи, оваа техника може да биде од непроценлива корист за вас.
Техниката џала нети се користи од страна на практикантите на јога и ајурведа во Индија илјадници години. Некои јога учители сметаат дека нети е значајна техника за чистење на енергетските канали и балансирање на левата и десната хемисфера.
Назална хигиена
Особено во модерениот свет кој е исполнет со загадувачи, алергени и прашина, важно е носната шуплина да биде чиста и здрава. Многу научници сметаат дека носната шуплина е вратата за многу болести. Назалните канали всушност имаат механизми на влакна и слузокожа кои имаат за цел да ги задржат надворешните фактори надвор од нашите тела. За жал, овие механизми може да станат преоптоварени поради високата изложеност на прашина и честички и факторите на загадување. Редовното чистењето на носните шуплини овозможува тие да работат поефикасно, а со тоа нашите тела да останат здрави и силни.
Не е изненадување дека со зголеменото присуство на хемикалии во воздухот, загадувањето, прашината, поленот, нашите ноздри се под голем стрес. Поради наведените фактори има и голем пораст на бројот на луѓе кои се мачат со различни форми на назална конгестија и респираторни болести. Модерната исхрана ја сочинува храна, која што го зголемува производството на слуз во телото а со тоа доаѓа до создавање на нерамнотежа и затнување на носните канали и синусите.
Начин на изведба
Во лотата се става млака вода и едно кафено лажиче морска сол, која треба добро да се раствори во водата. Лотата се зема во левата дланка и малиот отвор се става во левата ноздра. Устата во текот на техниката е отворена и се диши низ неа. Главата се наведнува напред и десно, за да може водата што протекува низ левата ноздра слободно да истече низ десната.
Истото се повторува и од десната ноздра со втората половина од водата во садот. Кога ќе завршите, оставате водата слободно да истече од ноздрите и се чека носните шуплини добро да се исушат.
ПРЕДУПРЕДУВАЊЕ:
Не треба да се применува при акутни крварења од носот и до една година по пунктирање на синусите или операција на средното уво.
*лота е садот за изведба на техниката Џала нети.
Препораки:
- водата треба да биде со температура на телото, а се препорачува користење на морска сол;
- се почнува прво низ левата ноздра или низ онаа што е затната и да се чека додека не стане проточна;
- отворот на лотата треба добро да влезе во ноздрата за да не истекува водата низ неа;
- најдобро е да се изведува наутро, а во зимските периоди да се внимава да не се излегува веднаш на ладен воздух;
- доволно е да се прави еднаш неделно, а при носна алергија може и секој ден.
За подетални информации консултирајте се со јога инструктор.
Дејства:
- поволно делува при чести настинки, грип, главоболки, несоница, астма и други респираторни проблеми;
- со редовно изведување се намалува сензитивноста на слузокожата на ноздрите и се намалуваат тегобите предизвикани од алергиите.
УСЛОВИ ЗА ПРЕЗЕМАЊЕ
Текстовите и останатите материјали што ги објавува Омниа.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Омниа.мк.
