Несоница обично се дефинира како нарушување на сонот, кое може да биде со потешкотии при заспивање или неможност да се одржи сонот. Последиците од недостаток на сон се тешки и вклучуваат летаргија, раздразливост, недостаток на енергија, поспаност и вознемиреност меѓу другото.
Клинички, несоница постои кога има докази за нарушени модели на спиење во полисомнографски тест. Овој тест се спроведува за дијагностицирање на квалитетот на спиењето на пациентот. Се снимаат и анализираат био-физиолошките промени што се случуваат за време на спиењето. Со други зборови, се следат повеќе функции на телото поврзани со мозокот, очите, мускулите, срцето, итн. за да се утврди дали субјектот е доволно одморен.
Доколку ви е потребно подолго време да заспиете или често се будите во сред ноќ тоа се знаци дека имате несоница. Откриено е дека 3 од 10 возрасни во моментов покажуваат еден од симптомите на несоница.
Иако модерната медицина наведува повеќе причини, како и можни третмани за несоница, јогините веруваат дека несоницата е чисто отсуство на релаксација. Во денешната технолошка доба, ја загубивме способноста да ги релаксираме нашите тела и умови. За жал, многумина користат бројни различни средства за смирување за да си помогнат да заспијат и да ја намалат менталната вознемиреност.
Користењето такви хемикалии создава маѓепсан круг. Прво, вознемиреноста се создава поради неможноста за спиење. Ни фали одмор, нашите телесни ткива не добиваат доволно храна и не сме во состојба да ги исфрлиме токсините од нашето тело. Се будиме чувствувајќи умор и летаргија. Истовремено создаваме чувство на страв кон спиење поради искуствата од минатото дека не можеме да спиеме. На крај тоа резултира со пиење апче, што создава друга форма на напнатост во телото.
Во моментов, постојат многу методи што луѓето ги користат за да можат да заспијат. На пример, броење овци, екстремни физички тренинзи (што повеќе го заморуваат телото отколку што го релаксира), чаша топло млеко, итн.
Како да го опуштиме умот и да го подготвиме телото за спиење?
Прво, важно е да се разбере дека времетраењето на спиење потребна за секој поединец може да се разликува. На некои може да им требаат десет часа, на други можеби четири. Општиот консензус е околу осум часа, но тоа се менува во однос на квалитетот на спиењето, исхраната, професијата итн. Важно е да не се опседнуваме колку часови имаме отспиено. Поважно е да бидеме сигурно дека имаме квалитетен сон.
Јога практики за несоница
Јога нидра
Јога нидра, инаку наречена јогиски сон, е техника во која се опуштате со целосна свесност. Обично се практикува лежејќи во шавасана и може целосно да ги смени моделите на спиење за секој практикант. Иако Јога нидра има многу намени, кога се практикува за да се подобри квалитетот на спиењето, треба да се работи лежејќи во кревет. Тоа треба да биде последна активност пред спиење.
Пранајама – Брамари
Зборот брамар значи пчела. Во оваа пранајама,се имитира ниската вибрација на пчела додека седиме во медитативна положба, ушите затворени со показалците. Ова создава длабока постојана вибрација што може да слушне или почувствуа во внатрешноста на главата. Оваа вибрација создава смирувачки ефект врз умот, ослободувајќи го стресот, напнатоста и вознемиреноста.
Пранајама – Уџаи
Уџаи е едноставна техника во која се стега глотисот (просторот помеѓу гласните жици) и дише низ носот. Оваа техника кога се изведува правилно звучи како ‘рчење на бебе. Уџаи е многу смирувачка пранајама која помага во ублажување на несоницата кога се практикува во Шавасана или положбата на трупот пред спиење.
Шаткарма – Тратака
Тратака е шаткарма техника што во превод значи концентрирано гледање во еден објект без да трепнеме. Тратака ни помага да се концентрираме и го смирува умот. Директно ја ублажува напнатоста, вознемиреноста и несоницата. Најдобро е да се практикува во темнина, гледајќи во пламенот на свеќа на ниво на очите.
УСЛОВИ ЗА ПРЕЗЕМАЊЕ
Текстовите и останатите материјали што ги објавува Омниа.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Омниа.мк.
