Крија јога е медитативна техника за контрола на енергијата преку пранајама и медитација, што го забрзува духовниот процес на практикантот. Потекнува од санкритските зборови „kri“ и „ја“ што значи „завршено дејство“.
Техниката Крија била криена во тајност многу векови. Таа била „оживеана“ во 1861 година кога големиот јогин Махаватар Бабаџи ја пренел техниката на својот ученик Лахири Махасаја. Потоа Лахири ја пренел техниката на неговиот ученик Шри Јуктешвар кој ја пренел на своите ученици меѓу кои бил и Парамханса Јогананда.
И покрај тоа што со години се практикувала во Индија, Крија јогата добива светско внимание откако била спомената во книгата „Автобиографија на еден јогин“ од Јогананда. Тој е познат како еден од современите основачи на Крија јогата и оној кој ја вовел практиката на Западот во 20-тите години на минатиот век.
Практиката на крија јога се учи само преку директна релација гуру – ученик и после церемонија на иницијација. Повеќето практиканти поминуваат голем дел од времето во самостојно учење и вежбање сè додека не станат подготвени да бидат иницирани во напредните практики на Крија јогата. На почетниците им се препорачува да користат мантра или збор со цел да го насочат своето внимание и напредок во подлабоки медитативни сесии.
Исто така се верува дека со „оживување“ на трите квалитети како светлина, звук и вибрација истовремено, практикантот е во состојба да навлезе во најдлабоките нивоа на потсвесниот ум. Тоа се постигнува преку примена на серија техники со соодветна концентрација, дишење и положба.
Како функционира кријата ?
Според Јогананда, Крија јогата е најефикасна техника достапна за човештвото за постигнување на целта на јогата – соединување со Боженственото. Крија јога е толку ефикасна затоа што работи директно со изворот – духовната енергија длабоко во нашиот ‘рбет.
Сите јога техники работат со оваа енергија, вообичаено индиректно. На пример, јога асаните може да ви помогнат во отворање и балансирање на енергетските канали долж ‘рбетниот столб. Техниките за дишење или пранајама може да помогнат да ја разбудите таа енергија.
Сепак, Крија јогата е подиректна. Таа му помага на практикантот да ја контролира животната сила преку ментално кревање и спуштање долж ‘рбетниот столб со свесност и волја. Според Јогананда, една Крија која трае околу половина минута, е еднаква на една година природен духовен раст.
Практикантите на Крија јога откриваат дека праксата ја подобрува нивната способност да се концентрираат и да станат подобри луѓе на секој можен начин.
УСЛОВИ ЗА ПРЕЗЕМАЊЕ
Текстовите и останатите материјали што ги објавува Омниа.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Омниа.мк.
